لماذا أقرأ .. ؟؟

السلام عليكم .. 
أزيكم جميعاً .. ؟؟

مرت فترة طوييلة جداً على أخر تدوينة لي هنا ..

الموضوع اللي هتكلم فيه ان شاء الله كان في بالي من وقت طويل ..

لأنه تقريباً كان أكتر سؤال أتسألته الفترة اللي فاتت في المدرسة بالذات .. 

ليه .. ؟؟ بما إن بنات فصلي مش من أشد المعجبين بالقراءة .. 

فكانوا مستعجيبين لما تيجي الفسحة و أطلع كتابي و أبدأ اقرأ فيه .. !!

أو في وقت الفراغ اللي بين الحصص _اللي نادر يحصل على فكرة !!_ ..

فكانوا علطول بسألوني أنتي ليه بتقرأي .. ؟؟

و غيرها من الأسئلة اللي تتعلق بالقراءة .. 

فقررت أني أجاوب على الأسئلة دي ..

اللي كان أهمها .. 

سـ1\ نهى أنتي ليه بتقرأي .. ؟؟

السؤال ده خلاني أفكر كتير قبل ما أجاوب عليه .. 
في كتير اسباب تخلي الواحد يقرأ ..
اهمها : أنها مطلب شرعي و وسيلة للتعلم والتعبد لله تعالى .. 

غير الأسباب دي _ بالنسبة لي طبعاً _
أن أسعد لحظات حياتي لما أمسك كتاب أو رواية جميلة و أبدا أقرأ فيها و تتنقل عيني بين سطورها وبين طيات صفحاتها

و تتسابق معها ..
1\ علشان الأحساسيس المختلفة اللي بتغمري أثناء و بعد القراءة .. 
محدش جاله أحساس العزة والفخر والكرامة لما بيقرأ في كتب التاريخ و السيرة النبوية الشريفة .. ؟؟
ولا الكآبة والضجر والملل لما تضطر تفتح كتاب الفيزيا علشان عندك امتحان فيه .. ؟؟

2\ برضه أن ممكن أقدر أكون في أكتر من مكان في وقت واحد ..
زي لما بقرأ عن رواية خيال علمي عن المستقبل البعيد مثلاً .. مش شرط يكون ده اللي هيحصل فعلا في المستقبل ..
لكن اديني عشت في زمنين مختلفين أهوه .. في حد عنده إعتراض .. ؟؟
وبما أني ما اقدرش اسافر ألف العالم كله _في الوقت الحالي وان شاء الله في المستقبل xD_

فببساطة أقدر أقول أني عشت في بريطانيا لما كتب بقرأ "أوليفر تويست" لتشارلز ديكينز ..
و "كبرياء وهوى" لجين أوستين .. 
و عرفت أزاي كانوا بيعيشوا في وقتها ..
و ده غير الروايات التانية اللي حصلت في مختلف أنحاء العالم ..

و أتوقع ان إجابتي مش هتبقى أروع مما قاله العقاد لما سألوه أنت ليه بتقرأ وقال لهم :

’’ لست أهوى القراءة لأكتب، ولا لأزداد عمرًا في تقدير الحساب، إنما أهوى القراءة لأن لي في هذه الدنيا حياة واحدة، وحياة واحدة لا تكفيني، ولا تحرك كل ما في ضميري من بواعث الحركة. القراءة وحدها هي التي تعطي الإنسان الواحد أكثر من حياة واحدة، لأنها تزيد هذه الحياة عمقًا، وإن كانت لا تطيلها بمقدار الحساب؛ فكرتك أنت فكرة واحدة، شعورك أنت شعورواحد، خيالك أنت خيال فرد واحد إذا قصرته عليك، ولكنك إذا لاقيت بفكرتك فكرة أخرى، ولاقيت بشعورك شعورًا آخر، ولاقيت بخيالك خيال غيرك، فليس قصارى الأمر أن الفكرة تصبح فكرتين، وأن الشعور يصبح شعورين، وأن الخيال يصبح خيالين.. كلا وإنما تصبح الفكرة اذا التلاقي مئات الافكار في القوة والعمق والامتداد ‘‘

سـ2\ نهى, أنتي بتضيعي وقت لما بتقرأي حاجات خيالية أو قصص عن ناس عاشت في القرون الماضية ..؟؟
القراءة مش مجرد تضيع وقت غير على اللي شايف نفسه ما بيستفيدش حاجة منها ..
وايه يعني لما الواحد يقرأ حاجات خيالية و روايات و قصص, جزء من كدة اللي ذكرته سابقاً ان الواحد ممكن يعيش أكتر من حياة وأكتر من زمن و أكتر من حياة واحدة ..
و كمان القراءة هتبقى أحسن أكيد من القعدة الطويلة اللي على التلفزيون و متابعة الأخبار الموجعة للقلب ..
وافضل من المكوث فترة طويلة على النت والفيس والتويتر وكل الحاجات دي >> محدش يقولي أمال انتي بتعملي إيه دلوقت ؟؟

بس بيكفي أنك تقعد في مكان مريح و تطلق العنان لمخيلتك .. !!

سـ3\ نهى, لما بتقرأي رواية طويلة بتفتكري الأحداث اللي فاتت ؟؟ ما بتنسيهاش يعني !! وعمرك ندمتي على حاجة قرأتيها .. ؟؟
ده غالباً بيعتمد على نوع الرواية و أسلوب الكاتب .. 
ياما كتاب فشلوا في ان يتركوا انطباع حلو عن الرواية و بيكون فيها إسهاب في الوصف وتنسى كتير من الأحداث في النهاية .. !!
و مقدرش اني أقول ندمت بالمعنى الحقيقي .. لأني أكيد مهما كرهت الرواية أكيد هكون طلعت منها بحاجة حتى لو كانت بسيطة..
يعني مثلا زي أني ما اتهورش وأقرأ للكاتب ده تاني 

دي كانت أهم الأسئلة اللي كانت بتتسألي .. 
حد أتسأل غير كدة .. ؟؟ وكان جوابكم إيه .. ؟؟

في أمان الله ..