لـبيك اللهم لـبيك .. حج 2012 =)

السلام عليكم و رحمة الله وبركاته .. 

كيف الحال و كيف الأيام معاكم .. ؟؟  

أولا أعتذر و بشدة عن التأخير أو بالأصح الإنقطاع عن المدونة .. لكن هي الظروف القاسية التي يعيشها اي طالب في الثانوية العامة اجبرتني على ذلك ..   

طبعا العنوان واضح : الحج .. 

لأن و كما تعرفون ان الله منَّ علي و على عائلتي بأن كملنا أخر ركن من أركان اسلامنا وهو الحج والحمد لله .. 

والحمد لله, الله يسر لنا أمورنا و كانت حجة موفقة و ميسرة .. 

صحيح تعبنا و مشينا مشي بطريقة رهيبة لكن ما كناش بنحس بالتعب ابدأ غير اول ما وصلنا بيتنا .. 

طبعا دي كانت أول حجة لي, فكنت متحمسة ليها بطريقة رهيبة .. و انا كنت متابعة الأفلام الوثائقية اللي كانت بتيجي في القنوات الدينية علشان نعرف فين نروح و فين نيجي و كدة يعني .. 

لكن الحقيقة غير ذلك .. مش قصدي ان الموضوع مكانش فيه تنظيم .. _ هوا فعلا مكانش فيه تنظيم  _ بس كانت الفوضى عارمة .. و زحمة بطريقة غير معقولة .. و طبعا مع اختلاف الأجناس فكان التفاهم من سابع المستحيلات ..  

مثلا يعني : في الوضوء .. العقل يقول ان النساء ليها مكان و الرجال ليهم مكان, لكن تعملي ايه لما تلاقي واحد جاي يتوضأ جنبك .. ؟؟ و اذا حاولتي تتفاهمي معاه ده لو لقتي لغة مشتركة  .. ولا هيعبرك من اساسو .. 

بس برضه نرجع نقول الحمد لله انه كمل علينا الحجة و رجعنا البيت سالمين ..

||

و إليكم بعض الصور : 

لما وصلنا إلى الطائف .. 

الميقات (قرن المنازل) ..

مخيمات عرفة ..

نهاية عرفات .. في طريقنا للمبيت في مزدلفة ..

مزدلفة _قبل الإزدحام_ .. 

مزدلفة _بعد اللإزدحام_ ..

طبعا بعد ما صلينا الفجر و بدأت الأفواج تتوجه لرمي الجمرى الكبرى .. أنا و ماما كنا مهلوكين من التعب فقمنا بتوكيل عمي و أخويا ..  طبعا بعدها أيام التشريق عمي مارضيش انا اوكله و قالي لازم تيجي ترمي علشان تحسي انك حجيتي .. و أمري لله كان لازم أروح .. 

في الطريق لرمي الجمرات ..

في الطريق لرمي الجمرات .. 

الجمرة الصغرى .. 

في الطريق للجمرة الوسطى ..

الجمرة الكبرى ..

و بكدة خلص أول يوم من أيام التشريق, تاني يوم بقى قلت لعمي الحمد لله حسيت اني حجيت خليني أوكلك برمي الجمرة التانية .. و الحمد لله عمي رضخ لطلبي و راح يرمي الجمرة التانية عني .. طبعا أحنا حبينا نعجل .. فيوم 12 من ذي الحجة عملنا طواف الإفاضة مع الوداع .. و اليوم ده كان ازحم يوم شهدته الكعبة لدرجة ان الدفاع المدني ارسلوا SMS للناس تقول لهم ما تجوش تطوفوا النهاردة علشان الزحمة و سلامتكم .. لكن ماما أبت العدول عن القرار و رحنا نطوف .. و فعلا ربنا سهلها علينا و خلصنا طواف في ساعة و نص بس _ده إنجاز عظيم على فكرة_ 

الكعبة من الدور التاني .. 

المسعى من الدور التاني ..

جبل الصفا ..

حمام الحرم ..

و بكدة نكون خلصنا حجتنا و الحمد لله و روحنا البيت في نفس اليوم .. و لما وصلنا بدأت أعراض الإنفلونزا  و بعدها بيومين سافرنا لمصر و غبت عن المدرسة أسبوع كامل .. ولما رجعت انصدمت لما عرفت ان المدرسات خلصلوا نص 3\4 المنهج في الإسبوع ده   .. و ده كان سبب انشغالي عن وضع التدوينة .. 

اتمنى تكونوا استمعتوا معايا .. والموضوع كان خفيف عليكم ..     يا رب اشوف كومنتس كتير علشان انا بجد تعبت في الموضوع ده ..    
و ترقبوا موضوع عن سفرتي المصر بعد غياب سنتين و نص عنها قريباً ان شاء الله ..     

في أمان الله ..